សៀមរាប៖ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិលលោក ម៉ៅ ហាវណ្ណាល់ បានទៅទទួលស្វាគមន៍ដល់អ្នកដំណើរ ២០៨នាក់ ដែលបានធ្វើដំណើរតាមយន្តហោះខ្នាតធំ ប្រភេទប៊ូអ៊ីង ៧៧៧-២០០ ហោះត្រង់ពីទីក្រុងស៊ីដនីមកកម្ពុជានៅអាកាសយានដ្ឋានអន្តរជាតិសៀមរាបអង្គរ ក្នុងខេត្តសៀមរាប នៅថ្ងៃសុក្រ ទី២៤ ខែវិច្ឆិកា ឆ្នាំ២០២៣នេះ។
អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល លោក ស៊ិន ចាន់សេរីវុត្ថា បានឱ្យ EAC News ដឹងថាការមកដល់នៃយន្តហោះខ្នាតធំ ដែលហោះបានឆ្ងាយនេះបានបង្ហាញពីសមត្ថភាពរបស់ព្រលានយន្តហោះរបស់កម្ពុជាក្នុងពេលបច្ចុប្បន្ន និងជំរុញការហោះហើរត្រង់ពីបណ្ដាប្រទេសផ្សេងទៀតដោយប្រើយន្តហោះធុនធំមកកាន់ខេត្តសៀមរាបបន្ថែមទៀតផងដែរ។
លោកថា៖ «ក្រោមម្លប់សន្ដិភាពនិងក្រោមមាគ៌ាដឹកនាំដ៏ឈ្លាសវៃ ត្រឹមត្រូវ និងប្រកបដោយគិតបណ្ឌិតដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាថ្ងៃនេះជាថ្ងៃប្រវត្តិសាស្ត្រតែមួយគត់ ដែលខេត្តសៀមរាប ក៏ដូចជាអាកាសយានដ្ឋានអន្តរជាតិសៀមរាបអង្គរ»។
ពិធីស្វាគមន៍ទទួលជើងហោះហើរនេះត្រូវបានរៀបចំឡើងតាមលក្ខណៈប្រពៃណីជាតិនិងអន្តរជាតិ តាមរយៈការបាញ់ទឹកទទួលស្វាគមន៍យន្តហោះ ជូនបាច់ផ្កា និងក្រម៉ាជូនដល់អ្នកដំណើរ គ្រប់ៗគ្នាទាំង ២០៨នាក់ និងក្រុមហោះហើរយន្តហោះ ១៦នាក់ផងដែរ៕